Actualités

Partagé sur :
• facebook

Nifamotoana teny Anosy nanoloana ny minisiteran’ny raharaham-bahiny ny fikambanana Hafari Malagasy omaly ho fanehoana fa tena mijaly ny vahoaka Malagasy eo amin’ny resaka ady tany. Fanamarihana nentin’ny filohany Rafanomezantsoa Jean Nirina moa fa tsy tokony horafetina maimaika ny lalàna momba ny fananantany.

Mila jerena manokana ny soatoavina tena Malagasy izay miainga foana any amin’ny ara-drariny ary mizotra mankany amin’ny ara-dalàna. Ny ara-drariny dia ny fampanjakana ny fifampitokisana eo amin’ny samy Malagasy, hoy ny tenany. Ny olana misy anefa dia mifanohitra foana ny ara-drariny sy ny ara-dalàna. Mahavelom-bolo ny fampanantenana nataon’ny filoham-pirenena sy ireo mpamatsy vola vonona ny hiara-dalana amintsika. Manamafy ny Hafari Malagasy fa ny fametrahana ny fanjakana tan-dalàna no zava-dehibe indrindra amin’ny fampandrosoana ny firenena. Midika io fa tokony hifanaraka amin’ny tombontsoan’ny vahoaka ny lalàna izay hipetraka. Raha tsy maintsy ho tonga amin’ny fanalana ny mponina amin’ny toerana nonenany sy nohajariany, ohatra, dia soso-kevitry ny fikambanana ny hitondrana fepetra mifanaraka amin’izay. Nanamafy Rafanomezantsoa Jean Nirina fa hiady hatramin’ny farany ny zon’ireo vahoaka madinika amin’ny resaka fananantany ny fikambanana HAFARI Malagasy. Tetsy Anosy omaly dia nisy andian’olona maro nilanja sorabaventy naneho ny hitadiavam-bahaolana manoloana ny nandravana ny trano sy nanilihana azy ireo tamin’ny tany nonenan’izy ireo. Nanamarika ny filohan’ny HAFARI fa hahery vaika hatrany ny hetsika fanairana ny tompon’andraikitra isan-tsokajiny hotanterahin’izy ireo izay mbola hitohy eny amin’ny hotely Panorama Andrainarivo rahampitso alakamisy.

Tia Tanindrazana

Samia mijoro ho an'i Gasikara.