Mpitrandraka harena

an-kibon'ny tany an-tsokosoko

Actualités
Alatsinainy 27 Aprily 2026

12 lahy voasambotra tany Soanierana Ivongo

Ripak'ireo mpitrandraka harena an-kibon'ny tany an-tsokosoko ny alan’i Ambalanirana - Fokontany Tanandava – Kaominina Manompana – Distrikan’i Soanierana Ivongo. Efa nanaovana hetsika nifarimbonan'ny Fitaleavam-paritra ny tontolo iainana sy ny fandrosoana lovainjafy Analanjirofo, niaraka tamin’ny mpitandro ny filaminana nahitana ny Vondron-tafika ao Vavatenina, Zandarimariam-pirenena, ny Polisim-pirenena, ary ireo vondron’olona ifotony mpitantana ny ala : VOI Mahasoa, VOI Tanandava, namoahana azy ireo tao anaty faritra arovana saingy nisy ireo mbola ninia niverina. Voasambotra ny 12 tamin'ireo mbola ninia niverina sady namotika ala sy ny rohivoary ao aminy taorian’ny fandroahana azy ireo. Hatolotra ny Fitsarana ireto olona ireto ary tsy maintsy iharan’ny sazy mifandraika amin’ny fandikan-dalàna nataony. Narahana fanentanana ireo mponina manodidina ny ala ity hetsika ity, nampatsiahivana azy ireo fa raran’ny lalàna ny fitrandrahana harena an-kibon’ny tany ao anaty faritra arovana.
Jean D.