Minisiteran’ny varotra sy fanjifana

Efa miroso amin’ny fanadihadiana momba ilay fahapoizinana

Actualités
Talata 17 Jona 2025

Tsy nipetra-potsiny fa omaly ihany dia nidina ifotony teny Ambohimangakely,

toerana nisy ilay trano fanaovana lanonana nahafatesana olona maro tao anatin’ny fankalazana ny tsingerin-taona ny Ministera tompon’andraikitra. Ny fitsirihana hataon’ireo laboratoara no hamaritra ny fisiana fanapoizinana avy amin’ny kalitaon-tsakafo, araka ny fanazavan’ny Tale misahana ny Fiarovana ny mpanjifa (DPC) ao amin’ny Minisiteran’ny Fampiroboroboana ny indostria sy ny Varotra (MIC) Ravelonarivo Ando.Ireo sakafo na akora izay nampiasaina mampiahiahy dia hanaovana fanadihadiana avokoa, raha araka ny fantatra. Raha sanatria sakafo simba na lany daty na nampiasaina nafangaro tsy tam-piheverana dia mety hiteraka fahavoazana ho an’ny mpanjifa ka miroso avy hatrany amin’ny fanagiazana na “saisie” ny Fanjakana. Na izany aza, ny heloka ara-barotra izay niteraka fahafatesana dia miditra avy hatrany eny amin’ny fitsarana ary ny fanadihadiana lalina no hamaritra ny tohiny, hoy ihany ny DPC. Mifanolo-tanana ny departemanta ministerialy voakasika rehetra amin’ny fanatanterahana ny fanadihadiana, raha araka ny vaovao azo hatrany.
Nangonin’i Pati
Legende : Efa mandeha tahaka izao ny fitsirihana ! Sarin’ny Ministera