Actualités

Partagé sur :
• facebook

Misy miaramila tsy fantatra mazava na mbola miasa eo anivon’ny tafika Malagasy na tsia intsony amin’izao fotoana, saingy mbola mandray karama tsy tapaka raha ny vaovao azo.

Nalefa nanaraka fiofanana any ivelany izy ireo ary voasoratra mazava tsara ny fotoana hahafahany mijanona any. Miisa 7 eo, ohatra, no nandeha teo anelanelan’ny taona 2009 ka hatramin’ny 2014, ka tany Frantsa no ankamaroany. Hatramin’ny volana oktobra 2016 anefa izy ireo no tsy niverina an-tanindrazana, raha ny loharanom-baovao azo. Manodidina ny herintaona avokoa ny halavan’ny fotoana voasoratra mazava tsara hahafahan’izy ireo mijanona any ivelany, toy ny hoe 2009-2010, 2012-2013. Midika izany fa nisy ny mety ho tsy fanarahan-dalàna na koa kolikoly goavana, ka hahafahan’ireo miaramila sokajiana ho mpivangabao sy efa manana ny fiainana manokana na asa hafa mihitsy any an-dafy kanefa mbola misitraka soa aman-tsara ny volam-panjakana karamany aty an-tanindrazana ihany. Fanontaniana mipetraka ny hoe : ara-dalàna ve ny nandraisan’izy ireo karama taorian’ny fahataperan’ny fiofanana, kanefa tsy niverina tamin’ny asany ? Hotakian’ny fanjakana aminy ve ny volabe voalaza fa karamany tao anatin’ny taona vitsivitsy na tsy teo anivon’ny tafika Malagasy intsony aza ? Ny tsy fantatra dia ny hoe nisy ve ny fanalavana ny fe-potoana hahafahan’izy ireo mijanona any ivelany sa nampanaovina iraka manokana hafa mihitsy, ka izay no maha raikitra azy any ? Andrasana kosa ny mety ho fanazavana avy any amin’ny minisiteran’ny fiarovam-pirenena momba ity raharaha ity satria izy ireo no heverina fa mahalala amin’ny antsipiriany ny mikasika ity toe-javatra ity.

Toky R

Tia Tanindrazana

Samia mijoro ho an'i Gasikara.