Marotaolana – Vatomandry

Partagé sur :
• facebook

ainy tamin'ny fanjanahantany

Lanonana tsotra nefa niavaka no nentina nahatsiaro ny tolom-panafahana 1947 tany Vatomandry ny 29 martsa teo. Teo ny fametrahana takelam-pahatsiarovana tao Marotaolana, Kaominina Ambanivohitra Ambodivoananto, "toerana mifono tantara tamin'ny hetsika fanafahana nataon'ny malagasy tamin'ny taona 1947", araka ny fitantaran'i Sophie Ratsiraka, solombavambahoaka voafidy tao Vatomandry nitarika ny hetsika. Nambarany fa "anjatony ireo Malagasy namoy ny ainy novonoina tamin’ny fomba feno habibiana nandritra ny fanjanahantany tao Marotaolana anefa dia tsy voasoratra anatin'ny tantara izany na niniana nohadinoina". Koa ho fanomezam-boninahitra ny fanahin'ireo mahery fo no nanorenana ity takelam-pahatsiarovana ity mifamatotra amin'ny daty tsy voakosoka eo amin'ny tantaran'i Madagasikara 1947. Nanamafy Ramatoa Solombavambahoaka fa tsy tokony hohadinoina ny tantara, fa kosa tokony hovelomina sy hampahafantarina hatrany ny taranaka faramandimby. “Zava-dehibe ny fitadidiana ny lasa, satria izany no manampy antsika hanorina hoavy matanjaka sy mirindra,” hoy izy. Nankasitraka ity hetsika ity ny mponina notarihin'ny Ben'ny tanàna tao an-toerana, izay nilaza fa manan-danja lehibe amin’ny fanabeazana sy ny fanamafisana ny firaisankina nasionaly izao hetsika izao. Fa tamin'io andron'ny 29 martsa 2026 io ihany koa i Sophie Ratsiraka dia manome voninahitra an'i Amiraly Didier Ratsiraka. Raha tsiahivina dia ity farany no nanangana ny "Mausolée" eo Ambohitsaina Antananarivo Renivohitra ho fanomezam-boninahitra ireo maherifon'ny firenena sy ireo maty ho an'ny Tanindrazana ary nametraka ny 29 Martsa ho daty fahatsiarovana sy fisaonam-pirenena, 50 taona lasa izay (1976- 2026).
Nangonin'i Jean D.
Takela-pahatsiarovana ho fanomezam-boninahitra ireo Malagasy namoy ny ainy noho ny fitiavan-tanindrazana tao Marotaolana
 

Tia Tanindrazana

Samia mijoro ho an'i Gasikara.