Manohana ny fanovana

ny Diovy i Madagasikara

Actualités
Alarobia 18 Martsa 2026

Miandry ny praiminisitra hiady amin'ny

tsy fandriampahalemana, kolikoly...
Nanao fanambarana omaly ny Vovonana politika Diovy i Madagasikara etsy Antsakaviro fa manohana ny fanovana tarihin'ny Kolonely Randrianirina Michael, izay mitondra ny tany sy ny fanjakana mijoro eto Madagasikara ankehitriny izy ireo. Manoloana izany dia andrasanay aminy, hoy izy ireo, ny fiarovana ny fiandrianam-pirenena sy ny firaisam-pirenen'ny vahoaka malagasy. Eo koa ny fanajana ny soatoavina malagasy izay miorina amin'ny fahatahorana an'Andriamanitra, ny fihavanana, ny fifanajana, ny fifampierana ary ny ady amin'ny kolikoly, izay fanetriben'ny tany, mampahantra ny firenena malagasy ka ilaina fongorina. Mankasitraka ny filohan'ny fanavaozana ny repoblika malagasy ny vovonana nanendry ny praiminisitra Mamitiana Rajaonarison, izay fantatry ny be sy ny maro fa olona azo itokiana sy tsy azo avilivily satria manana traikefa amin'ny ady amin'ny kolikoly. Miarahaba sady mitsodrano ny praiminisitra vaovao hahaleo hahalasa ka hahatontosa soa aman-tsara ny adidy sy andraikitra ho sahaniny. Vonona izahay hitondra anjara biriky amin'izay andraikitra apetraka aminy, hanatanterahana ny fanovana tena izy, hoy hatrany hatrany ity vovonana ity sady namarana hoe masina ny tanindrazana, diovy i Madagasikara.
J. Mirija