Actualités

Malagasy 130 avy any Maorisy Tsy maintsy mihiboka mandritra ny 14 andro

Actualités
Alatsinainy 22 Jona 2020

Malagasy miisa 130 no nigadona tamin’ny fiaramanidin’ny Air Mauritius teny Ivato ny sabotsy lasa teo.Olona niasa tany amin’ity nosy rahavavy ity , na namita iraka, na namangy olona, na nitsabo tena izy ireo ka tavela tany rehefa nampiharina ny fihibohana tanteraka.

Na i Maorisy na i Madagasikara mantsy dia samy nanidy ny sisintaniny avy ka noho izany tsy nisy fiaramanidina na sambo mitatitra olona afaka niditra na nivoaka.Efa natao fitiliana tany am-piaingana ary mbola naverina natao fitiliana teny Ivato ireto Malagasy 130 avy any Maorisy ireto.Tsy maintsy mbola mihiboka mandritra ny 14 andro koa izy ireo ; mbola hisy ny fitiliana hafa atao ka aorian’izay vao mahazo mody any an-tokantrano rehefa azo antoka fa tsy voan’ny Coronavirus.Nisy ny taratasy fanekena nosoniavin’izy ireo ny amin’ny fanajana ny fepetra rehetra napetraky ny fitondram-panjakana Malagasy.Nitondra ireo Maorisiana tavela teto Madagasikara avy hatrany moa ity fiaramanidina ity rehefa niverina.

RTT