Maitre Eric Rafidison

«Fandikan-dalàna tanteraka no nataon’ny filoham-pirenena!»

Actualités
Alatsinainy 28 Jolay 2025

Ho sarotra amin’ny mpitsara ny hanoy ny fanadihadiana amin’ity raharaha

fanapozinana ara-tsakafo teny Ambohimalaza ity, hoy ny mpisolovava ireo fianakavian’ny niharamboina, Maitre Eric Rafidison. Mbola tsy vita hatramin’ny farany ny fanadihadiana saingy efa nitondra fanazavàna mikasika ity raharaha ity i Andry Rajoelina ary mety ho tatitra diso no voarainy raha tena manaraka io raharaha io isan'andro marina ny tenany, hoy ity mpisolovava ity. Mbola tsy nisy hatreto ny fakàna am-bavany an’i Fenohasina sy ny reniny, izay torian'ireo fianakavian'ny niharamboina, saingy efa karazana tatitra ireny nataon’ireo tomponandraikitra eto amin’ny firenena ireny, hoy izy. Fandikan-dalàna tanteraka, araka izany, no nataon’ny filoham-pirenena, Andry Rajoelina, amin’ny tsy fanajàna ny tsiambaratelon’ny fanadihadiana sy ny fisaraham-pahefana! Maninona no tsy natao fitsirihana tsirairay ireo maty tamin’ity fanapozinana ity? Lasa niverina tany amin’ny Donut araka ilay nambaran’ny minisitry ny fahasalamana no nisy ilay poizina nefa nisy tamin’ireo marary no tsy nihinana Donut fa sakafo hafa nandritra iny andron'ny 14 jona 2025 iny, hoy hatrany izy.
Nangonin’i J. Mirija