Actualités

Mahajanga Tsy naneno ny kiririoka

Actualités
Alakamisy 13 Aogositra 2020

Nilamina ny tanànan’i Mahajanga. Nizotra toy ny isan’andro ny fiainan’ny mponina.

Tsy naneno ny kiririoka nifampitaoman’ireo milaza fa manohitra ny fepetra amin’ny fihibohana noraisin’ny foibem-pibaikoana ny covid-19, Faritra Boeny. Nifanentana tamin’ny tambazotran-tserasera ireo manohitra ny fepetra amin’ny fihibohana, fa hitsoka kiririoka rehefa mipaika ny amin’ny 12ora sy sasany atoandro omaly alarobia ho fanehoana ampahibemaso izany. Araka ny fanazavan’i Achim Kely, isany nitarika ny fanentanana tamin’ny facebook, dia « amin’izao hetsika voalohany izao dia isaky ny tanàna no manao azy ka eo amin’ny varavara ihany no mitsoka kiririoka, ny sasany eny amin’ny tsena izay vao manomana fidinana an-dalambe amin’ny manaraka ». Tsy raikitra anefa izany, ary rehefa nanontaniana ny antony ity kandida Ben’ny tanàna tao Mahajanga ary kandida tamin’ny fifidianana depiote farany teo ihany koa ity, dia nilaza izy fa « maro miaramila de somary nanano sarotra ».

Jean D.