Lahatra Andriamahatsangy

«Tokony hahita vokatra isika

Actualités
Alakamisy 30 Oktobra 2025

mialohan’ny faran’ny taona!»

Governemanta feno tekinisianina no nitsangana, hoy ny mpamakafaka politika, Lahatra Andriamahatsangy. Misy mpanao politika vitsivitsy ao, hoy izy, saingy mpanao politika hita hoe tsy maintsy ho anatin’ny endrik’ilay governemanta. Iny tsinona ilay tsy maintsy hametrahan’ny mpitolona fanontaniana hoe iza no nitarika ny tolona nefa toa tsy ao? Efa ao ireo. Manampy azy ireo kosa ireo tekinisianina izay tena vonon-kiasa ary hita hoe olom-baovao ihany koa, amin’ny ankapobeny, no sady tanora, hita taratra amin’ilay Gen Z ihany koa. Tanora no tena nitondra fanovàna dia ilaina hita koa izay. Avela hiasa aloha izy ireo fa raha ny endrika ivelany sy ny tekinika taratra dia inoana fa hisy ny vokatra. Ny endrika ivelany, iaraha-mahita fa misy goaika antitra na mpanao politika hatramin’izay ao. Ireo ilay nailikilika tany am-boalohany saingy tsy nisasaka akory moa ny tolona avy eo dia nantsoina daholo ny mpanao politika rehetra tsy an-kanavaka. Maro koa ny tanora Gen X, Y, Z anatin’ilay governemanta. Misy tena vao nahazo diplaoma vao haingana, tamin’ny taona 2024, dia efa lasa minisitra. Tokony hahita vokatra isika mialohan’ny faran’ny taona satria 2 volana no fe-potoana nifanomezana aloha! Mila mihazakazaka isika fa tsy afaka miandry. Afaka 6 volana, izany hoe, volana martsa na aprily any isika tokony efa hisy zavatra hita. Handalo fifidianana isika amin’ny volana may dia ho hita eo koa. Nametraka teboka miisa 6 ho laharam-pahamehana iny ny fitondràm-panjakàna dia ho hita hoe nanao ahoana ny fiasan’ilay governemanta? Hoavy ny fahavaratra dia tokony hivaha amin’ny ampahany izany izao ny resaka herinaratra sy rano. Eo koa ny fahasalamàna sy ny isan-karazany. Mialohan’ny faran’ny taona izany tokony efa hita ny vokatra fohy ezaka. 2 taona koa no fe-potoana nifanomezana amin’ilay tetezamitan’ny fanovàna dia ho hita eo, hoy hatrany i Lahatra Andriamahatsangy.
J. Mirija