Kaominin’i Bemasoandro

Partagé sur :
• facebook

Tsy afa-bela amin’ny olan’ny rano amin’izao fotoana izao ny kaominin’i Bemasoandro Itaosy,

hoy ny ben’ny tanàna ao an-toerana, Jimmy Ranitratsilo, nanazava ny zava-misy eo anivon’ity kaominina ity raha nanontrona ny fihaonana isan-taonan’ireo ben’ny tanàna aty amin’ny ranomasimbe indianina tetsy amin’ny Novotel Alarobia omaly. Ambany, hoy izy, ny vaika na «pression» an’ny rano. Be dia be no tapaka. Ny «bombonnes» tsy maharaka intsony. Maika, noho izany, ny rano ho an’i Bemasoandro. Misy vahaolana mipetraka ihany eo anivon’ny kaominina satria misy «forage» na fametrahana fantson-drano lehibe izao izay vitan’ny fitondràm-panjakàna ao amin’ny fokontanin’i Bemasoandro dia efa zava-dehibe aloha izay amin’ny resaka famatsiana rano ao amin’io fokontany iray io ary mety hipaka amin’ny fokontany hafa koa aza. Ezaka atao izao ny fanokafana lavadrano ho an’ny vahoaka. Ezahana ho ferana ny filaharana satria misy manararaotra ao anatin’izay. Ohatra hoe zerikanina na «bidon» miisa 50 indray milahatra eo daholo. Hanentanana ireo sefo fokontany sy fokonolona eny ifotony ny fandaminana izany. Manodidina ny 50 isa ankehitriny ny fitambaran’ireo paompin-drano na «bornes fontaines» hita amin’ireo fokontany miisa 6 mameno an’i Bemasoandro. Ny 50%n’ireo nefa azo lazaina hoe tsy mandeha ary maro ihany koa ireo zara raha mandeha na ambany dia ambany ny tanjany na «pression». Hita ho anton’io tsy fisian-drano io koa ny fiovaovàn’ny toetr’andro dia tsy maintsy miatrika izay ny kaominina. Miankina amin’ny toetr’andro sy ny aavo na «niveau» an’ilay rano ihany koa ny mety hivahàn’ilay olana fa miara-misalahy moa ny kaominina sy ny sehatra azo iaraha-miasa rehetra. Eo ny JIRAMA miatrika mivantana ny zava-misy. Ny «bombonnes» na ireo siniben-drano efa vatsiana rano miaraka amin’ny minisiteran’ny rano foana. Ny hivavahana dia ny mba hivahàn’ny olana haingana, hoy hatrany ny tenany.
J. Mirija
Légende : Ny ben’ny tanànan’i Bemasoandro
 

Tia Tanindrazana

Samia mijoro ho an'i Gasikara.