KAOMININA AMPITATAFIKA

Partagé sur :
• facebook

Anisan'ny toerana tratry ny tondra-drano

hatrany rehefa fotoam-pahavaratra tahaka izao ny kaominîna Ampitatafika, distrikan'Atsimondrano noho izy manamorona ny Reniranon'i Sisaony. Vao tamin'ny faran'ny herinandro teo ohatra dia tokantrano maro sahady no efa dibo-drano tao Avaratetezana, toerana izay nomarihin'ity Ben'ny tanana ity fa tsy mbola nanomezany taratasy hahazoana manorina trano mihitsy hatramin'ny fotoana nitantanany ny tanana no mankaty. Ankoatra ity tranga ity dia nambarany ihany koa fa fefiloha miisa 2 no indray vaky ao amin'ny Fokontany Ambohimangidy. Efa nisy ny fefiloha iray vaky tao an-toerana tamin'ny taona 2023 ka nanampy ny kaominîna tamin'ny fanarenana izany ny tetikasa Produir. Ankehitriny miisa roa indray no vaky vokatry ny tsy fitandreman'ireo mpitondra lakana mitaona biriky. Ny banky iraisam-pirenena no fantatra fa tokony hamatsy vola ny kaominîna Ampitatafika amin'ny fanarenana izany izay efa vita resaka saingy noho ny fihenan' ny tetikasa natokana hanampiana ny tany mahantra toa an'i Madagasikara dia tsy tanteraka indray izany raha araka ny fanazavany. Voatery hihantahanta any amin'ny tetikasa Produir indray ny kaominîna. Mikasika ny toerana handraisana ireo traboina moa raha mitohy ny ranon'orana dia notsindriany fa efa vonona izany toy ny ao amin'ny Fiangonan'ny olo-masina ny andro farany, ny eny amin'ny EPP sy CEG Faliarivo ary ny eny amin'ny tanimenabe izay hasiana trano lay.
Pati
Légende : Ny Ben'ny tananan'ny kaominîna Ampitatafika Rado Ramparaoelina !
 

Tia Tanindrazana

Samia mijoro ho an'i Gasikara.