KAOMININA ALASORA

Zokiolona 1.500 isa nozaraina fanomezana

Actualités
Zoma 21 Jona 2024

Zokiolona 1.500 isa nanomboka omaly Alakamisy 20 Jona no nozaraina fanomezana

na solombody akoho ho an’ny kaominina Alasora, distrikan’Avaradrano noho ny fahatongavan’ny Fetin’ny 26 Jona. Mihoatra ny 70 taona avokoa izy ireo hetsika efa fanaon’ny kaominina isan-taona izay nosokafana tamim-pomba ofisialy tao amin’ny Kianja Maitso. Ireo mbola salama sy afaka nandeha no notolorana izany tao an-toerana omaly raha mbola hotsidihin’ny Ben’ny tanana Randriantsoa Jimmy sy ny ekipany any an-tokantranony kosa ireo tsy afaka mandeha lavitra intsony na tsy salama. Nambarany tamin’io andron’ny omaly io fa hisitraka izany avokoa ireo zokiolona manerana ny Fokontany 20 isa mandrafitra ny tanana hiadidiany. Betsaka ireo efa nisoratra anarana saingy nisy ihany koa ireo mbola taraiky fa tsy ho diso anjara mihitsy. Nitohy avy hatrany tany amin’ny Fokontany Ambohidrazaka sy Ambohitanety moa ny dian’ny Ben’ny tanana sy ny ekipany omaly maraina raha tao amin’ny Yandy By pass sy tao amin’ny Fjkm Ambodivondava kosa no namaranana izany omaly hariva.
Pati
Legende : Nafana tahaka izao ny fizarana ilay solombody akoho tao Alasora omaly !