Actualités

Hopitaly Be Toamasina : Tsy misy solika ny gropy, mitokona ny mpitsabo

Actualités
Alatsinainy 01 Febroary 2010

Efa roa herinandro no nahatsapa ny tsy fahampian�ny solika mampihodina ny � gropy � fiandry teo anivon�ny Hopitalibe na CHU Toamasina ny tompon�andraikitry ny fahasalamana tao aminy.

Telo andro anefa izao dia maina tanteraka izany solika izany, ka mikatso tsy mandeha ny “gropy” fiandry ao. Ireo tsara sitrapo no andrasana hamelona azy indray aloha amin’izao fotoana izao.

Tsy misy vola

Tsy niandry fotsiny anefa ny teo anivon’ny Hopitaliben’i Toamasina fa efa nitaraina teo anivon’ny lehiben’ny Faritra Atsinanana, Alain Mahavimbina sy ny Talem-paritry ny fahasalamana ao Toamasina, ny Dr Zorah Bayant, saingy tsy mbola voavaly ny olana hatramin’izao. Ny teo anivon’ny Primatiora lefitra misahana ny fahasalamana ihany koa dia tsy hita ny tetibolan’ny Hopitaliben’i Toamasina hatramin’izao, izay manodidina ny 140 tapitrisa ariary isan-taona. Raha ny fantatra dia tetibola tamin’ny naha CHR azy ireo izany, nefa izay hatrany no nohazonina hatramin’izao. Ao anatin’io tetibola io avokoa anefa ny fandaniana rehetra ataon’ny hopitaly, ka anisan’izany ny solika ampiasaina amin’ny fiara sy ny « gropy » fiandry amin’ny herinaratra. 40 litatra isan’ora ny solika lanin’ity « gropy » ity amin’ny fihodinany. Ilaina anefa izy io satria na eo aza ny toky ataon’ny Jirama, dia tapatapaka lava ny herinaratra ao Toamasina izay tsy mifidy ora, nefa ny fitsaboana sy ny fandidiana ary ny fampiterahana ao amin’ny hopitaly tsy afaka hiandry izany olan’ny Jirama izany mihitsy.

Fitokonana

Nambaran’ny mpitsabo sy ny mpandidy eo anivon’ny CHU Toamasina, fa vitan’izy ireo avokoa ny fitsaboana rehetra, afa-tsy ny fandidiana mahakasika ny hozatra na retsika sy ny fo. Raha ny resaka fitokonana ataon’ny mpitsabo kosa, dia miranty ao amin’ny Hopitaliben’i Toamasina ny sora-baventy milaza izany ary ny fomba fiasa “week-end prolongé” no atao amin’ny asa fitsaboana, izany hoe “toy ny fomba fiasa mandritra ny faran’ny herinandro ny fandaminana ny asa, fa tsy tahaka ny ora fisokafana andavanandro teo aloha intsony”. Ny fantatra dia telo andro ao anatin’ny herinandro dia tena fiandrasan-draharaha sisa no ataon’ireo mpitsabo ireo.

Rakoutou