HAINTRANO TETSY ANOSIBE

Manodidina ny 100 ireo traboina

Actualités
Alakamisy 28 Aogositra 2025

Manodidina ny 100 isa ireo olona traboina vokatry ny haintrano nitranga tetsy Anosibe,

Boriborintany faha-4, afak'omaly Talata 26 Aogositra alina. Fianakaviana miisa 24 no lasibatra tamin'izany, nonina tamin'ny trano hazo miisa 10 sy trano biriky miisa 6. Eo akaikin'ny Eglizy Katolika Masindahy Jérôme Anosibe, no misy ireo trano ireo izay marihina fa efa in-telo may hoy ny fitarainan'ireo traboina. Vokatry ny afo nipoitra avy tamin'ny tokantrano iray no nahatonga ny loza, izay mbola tsy voafaritra mazava na noho ny afon-dabozia na noho ny antony hafa. Potika tsy nisy noraisina vokatr'izany ny fananana rehetra noharian'ny isan-tokantrano an-taonany maro. Toraka izany koa ireo fitaovam-pianaran'ny ankizy vao novidiana sy nangonina hoy hatrany ny fitarainan'ireo mponina. Tsy manan-koraisina intsony izy ireo noho izany. Tsy afaka hianatra ihany koa ny zanany....Misy amin'izy ireo no mbola mijanona mialokaloka eny an-toerana raha misy koa ireo efa lasa namonjy ny havana aman-tsakaizany.
Nangonin'i Pati
Légende : Nolevonin'ny afo tahaka izao avokoa ny entan'ireo traboina