Habetsaky ny rotsak’orana

Distrika maromaro nahazo fampitandremana

Actualités
Alarobia 31 Janoary 2024

Ahiana ho betsaka ny rotsak’orana (hahatratra 40 hatramin’ny 80 mm ao anatin’ny 24 ora)

any amin’ny morontsiraky ny faritra Vatovavy, Fitovinany ary Atsimo atsinanana ato anatin’ny roa andro manaraka, dia anio 31 janoary hatramin’ny rahampitso 01 febroary, araka ny fampahafantarana nataon’ny Foibe famantarana ny toetr’andro. Nisy noho izany ny fampitandremana eo anatrehan’ny mety hahabe ny rotsak’orana, izay mikorontana ny asa aman-draharaha andavan’andro, hampiandrona ny rano amin'ireo toerana mora tondraka. Nahazo fampitandreana miloko mavo ny distrikan’i Nosy Varika, Mananjary, Manakara, Vohipeno, Farafangana ary Vangaindrano. Nentanina ny rehetra mba hanaraka ny toromarika omen'ny manam-pahefana eny ifotony. Mifandraika amin’io rahateo ny fampitandremana mikasika ny fanonjan’ny ranomasina satria hanonja be na hahery ny ranomasina ka ho 2 hatramin'ny 3m ny haavon'ny onja any amin'ny morontsiraka eo anelanelan' i Mananjary sy ny tanjona Angotsy; Hahery ny ranomasina ka ho 2,5 hatramin’ny 3,5m eo anelanelan'i Mananjary hatrany Toliara.
Toky R