Actualités

Partagé sur :
• facebook

Tsy nampihemotra ny fitokonan’ny mpiasan’ny Air Madagascar ny fanapahan-kevitra noraisin’ny fanjakana hanao « réquisition » ireo mpiasa amin’ny alalan’ny mpitandro ny filaminana mba hiverina hiasa omaly. Farafahakeliny dia sidina sivy no tokony ho natao omaly kanefa na ny soridalan’ny sidina aza dia tsy nisy nanao akory.

 Nitohy ny  fitokonan’ny mpiasa ary hita ho  vonona ny tsy  hiverin-dalana intsony  raha ny fahitana azy ireo omaly. Etsy  an-kilany, mandeha ihany koa ny   fifandaminana na « médiation » izay tarihin’ny inspection  de travail na ny sampana mpanara-maso ny fananan’asa. Anisan ‘ny  nametraka  ny kaompania Air Madagascar  tamin’ny toerana  sarotra nandritra ny fifandaminana anefa ny fandroahana ireo mpiasa tsy  nandalo filankevi-pifehezana  sy ny  tsy fananan’ireo  mpiasa sasany  Cnaps na fanamarinana fandoavan-ketra ihany koa  kanefa tsy nahazo fampandrenesana  avy tamin’ny  mpampiasa. Manoloana izany rehetra izany  anefa  dia mitaraina mafy ireo  mpandeha  izay mihitsoka  eny Ivato  izay  tsy misy vola hatao sakafo intsony  no sady tsy  misy  fiantohana trano hatoriana nanomboka ny alatsinainy teo. Omaly dia  tonga teny  amin’ny biraon’ny  Air Madagascar teny Analakely  ireo mpandeha ireo  nitaky ny  fanonerana ny  saran-dalan’izy ireo. Tsy  vitsy  ihany koa ny mieritreritra ny hitory ny  Air Madagascar eny anivon’ny fitsarana. Ho an’ireo  mpizahatany izay mikasa ny  ho any  Ste Marie  mandritra ny  “festival  des baleines” indray  dia efa am-polony  maro ireo  mpandeha andrasana avy any ivelany no  nanafoana ny famandrihan-toerany. Andrasana  anio indray  izay mety  ho vokatry ny  fifandaminana na hiverina hiasa amin’izay ireo  mpiasa na hanaiky  hametra-pialana ireo  mpitantana efa mangidy hoditra eo imason’ny mpiasa.

Andry Ratovo    

Tia Tanindrazana

Samia mijoro ho an'i Gasikara.