Fihinanana trondro nisy poizina

Zazalahy 12 taona namoy ny ainy

Actualités
Talata 24 Jona 2025

Nisehoana fahapoizinana ara-tsakafo mahatsiravina indray ihany koa tao amin’ny

kaominina ambanivohitra Anosiala, distrikan’i Manakara, faritra Fitovinany. Tranga nahafaty zazalahy kely iray sy faharariana olona telo hafa, voatery nentina amin’ny hopitaly. Antony ny fihinanana trondro poizina. Araka ny loharanom-baovao, trondro karazana Bontana (anarana siantifika: Canthigaster valentini), fantatra amin’ny anarana hoe Botala, no nihinana ka niteraka fanehoan’ny vatana fanafintohina tampoka. Araka ny voalazan’ireo nanatri-maso, tsy nisy nahafantatra ny mety ho fiantraikan’ilay trondro ireo fianakaviana. Tsy ela taorian’ny fihinanana dia niseho ny soritr’aretina toy ny fanina, fanaviana, ary fahasemporana, ka voatery nentina haingana tany amin’ny toeram-pitsaboana izy ireo. Indrisy anefa, tsy tana intsony ny ain’ilay zazalahy 12 taona. Mampanahy fatratra izao tranga izao, indrindra amin’ny fotoan’ny fahavaratra sy fahadiovan-drano voajanahary ambany, izay ahafahan’ny trondro sasany mitahiry poizina mahafaty ao amin’ny nofony. Manentana ny manampahefana sy ny mpitsabo ny mponina mba ho mailo amin’ny fisafidianana hazan-dranomasina, indrindra raha tsy fantatra tsara ny karazany.
Asmynah Randriamananjara (Mpiana-draharaha)