Fiatrehana sy fisorohana ny loza

Partagé sur :
• facebook

Nifarana omaly tetsy amin’ny Novotel Alarobia ny atrikasa nandinihan’ny teo anivon’ireo

sampan-draharaha maro eto amin’ny firenena sy iraisampirenena mikasika ny fiatrehana ny loza voajanahary sy ny fisorohana ny loza ary ny fiatrehana izany loza izany. Eo ny fiaraha-miasa amin’ny IFRC na ny Federasionina iraisampirenen’ny vokovoko mena sy ny Vondrona eoropeanina ary ireo vokovoko mena rahavavy dia ny «Croix rouge» ao Alemanina sy Frantsa ary Luxembourg fa eo ihany koa ny «Croix rouge» malagasy, izay nilaza fa efa vonona ny hiatrika ny eny an-kianja taorian’izao atrikasa izao. Faritra miisa 5 izao no tena iasàna eto Madagasikara, hoy ny fanazavàn’ny mpitahiry vola nasionalin’ny Vokovoko mena malagasy, Rakotobeharivelo Josoa, dia Anosy, Vatovavy, Fitovinany, Atsimo andrefana ary Analamanga. Efa samy manana ny fitaovany avy ireo mpilatsaka an-tsitrapo ao amin’ny vokovoko mena na «croix rouge», hoy izy. Efa samy nahazo fiofanana hiatrika ny eny an-kianja ihany koa, hoy ihany izy. Nifantoka tanteraka tamin’ny fanamafisana ny fahaiza-manaon’ireo mpitarika na STAFF, mpilatsaka an-tsitrapo ary ireo rantsa-mangaikan’ny «croix rouge» isam-paritra ny atrikasa, hoy kosa ny mpandrindra tetikasa, Rasoloherivelo Andrianantenaina. Teo koa, hoy izy, ny fanamafisana ny fiaraha-miasa amin’ireo mpiara-miombon’antoka hafa toy ny BNGRC, ny minisitera, ny fitantanam-paritra rehetra ary ireo mpiara-miombon’antoka tsy miankina rehetra. Teo indrindra ihany koa ny fanamafisana ny fahaiza-manaon’ireo mponina eny ifotony, hoy ihany ny tenany. Miisa 150.000 moa ireo mponina hisitraka ity tetikasan’ny «Croix rouge» eto Madagasikara ity, hoy kosa ny fanamarihan’ny federasionina iraisampirenena na IFRC.
Nangonin’i J. Mirija
 

Tia Tanindrazana

Samia mijoro ho an'i Gasikara.