Fiantraikan’ny rivodoza

Partagé sur :
• facebook

hanohanana olona 93 000 ny ONU

Taorian’ny fandalovan’ireo rivo-doza tropikaly nifanesy namely an’i Madagasikara, naneho fanohanana ny rafitry ny Firenena Mikambana na ny ONU tamin’ny alalan’ny famoahana vola mitentina 5 tapitrisa dolara amerikana (22,2 miliara Ar eo raha havadika vola Malagasy) avy amin’ny Fonds Central d’Urgence (CERF). Ity famatsiam-bola ity dia vokatry ny fanohanana avy amin’ireo mpiara-miombon’antoka iraisam-pirenena, ary mikendry ny hanamora ny fandraisana andraikitra maika sy ny fiomanana amin’ny loza. Ny 2 tapitrisa dolara amin’io natokana ho an’ny fiatrehana marolafy mandritra ny telo volana taorian’ny fandalovan’ny rivo-doza Fytia, izay mikendry olona manodidina ny 30.000 ao amin’ny faritra Boeny. Ny 3 tapitrisa dolara kosa natokana ho an’ny fiatrehana mialoha (anticipatoires), izay efa navoaka talohan’ny fahatongavan’ny rivo-doza Gezani tao Toamasina. Ireo hetsika ireo dia nanomboka ny 10 Febroary ary kasaina hitohy mandritra ny volana manaraka, hahatratra olona 93.000 araka ny « protocole » napetraka, raha ny tatitra ofisialy. Miisa 6 moa ireo « Agences des Nations Unies » nandray anjara tamin’ny famatsiam-bola, ary niasa teo ambany fitarihan’ny mpandrindra maharitra na ny « Coordonnateur résident » eto amintsika. Nambara fa ireo dia nanohana ny ezaka nataon’ny BNGRC na ny Biraom-pirenena misahana ny loza sy ny tandindon-doza sy ny ministera isan-tsokajiny, indrindra amin’ny lafiny fandrindrana sy famolavolana tetikasa mifandraika amin’ny loza. Tanjona ny hanamora ny fidiran’ny fanampiana amin’ireo olona voakasika indrindra, amin’ny alalan’ny fanomezana sakafo, rano fisotro madio, fitsaboana, ary fanohanana ara-tsosialy. Ny famatsiam-bola mialoha dia manamarika fivoarana lehibe amin’ny fomba fandraisana andraikitra, satria manampy amin’ny fisorohana sy fanalefahana ny voka-dratsin’ny loza alohan’ny hisehoany.
Toky R

Tia Tanindrazana

Samia mijoro ho an'i Gasikara.