FIANAKAVIAN’I LINAH, MATY TANY DUBAI

Tsy manam-bola hampodiana ny razana

Actualités
Alakamisy 25 Aprily 2024

20 tapitrisa Ar be izao no saran’ny fampodiana ny vatana mangatsiakan’i Rasoarimalala Antoline,

fantatry ny maro amin’ny anarana hoe : Linah ilay tovovavy kely tera-tany Malagasy namoy ny ainy vokatry ny aretina efa nitaiza azy tany Dubai. Raha tsiahivina kely ny tantara dia avy any Sahamazava Andapa, Faritra SAVA ity tovovavy kely ity. Ny 21 Aprily lasa teo izy no namoy ny ainy izy ary mbola ao amin’ny tranom-paty ao amin’ny Iranian Hospital Satwa hatramin’ny omaly Alarobia 24 Aprily fotoana nanoratanay, raha ny vaovao azo. Mahatsiaro ho tena mangirifiry ireo fianakaviany vokatr’izany nefa tsy afa-manoatra ihany koa. Te- hanao antso avo amin’ny fampodiana ny vatana mangatsiakan-janany eto an-tanindrazana ireo fianakaviany ireo manoloana izany. Ahiana ho simba ihany mantsy ny razana, ny fotoana rahateo mandeha. Niasa moa no anton-dian-dRatompokovavy tany an-toerana fony fahavelony.
Nangonin’i Pati
Legende : Ireo fianakavian-dRatompokovavy nitafa tamin’ny mpanao gazety omaly !