Fianakavian’i Judicaël

«Mampalahelo fa nilalao aina ny hopitaly»

Actualités
Alatsinainy 23 Jona 2025

Nodimandry ny sabotsy teo, tamin’ny 12 ora atoandro, tao amin’ny hôpitaly CHU-JRA Ampefiloha

koa i Judicaël, tovolahy 22 taona, Mister Analamanga tamin’ny taona 2022, isan’ireo nanatrika ilay fankalazàna tsingerintaona teny Ambohimalaza, Imerikasinina, ny herinandro teo. Olona miisa 22 moa, raha tsiahivina, no namoy ny ainy hatramin’iny sabotsy 21 Jona teo iny. Nitantara ny niainan’izy ireo teo am-piandrasana ity tovolahy ity tany amin’ny hopitaly, fony izy mbola notsaboina, moa ny fianakaviany ary naneho ny alahelony fa toy ny milalao aina ny hopitaly raha nampiandraikitra ireo mpitsabo mpiana-draharaha na «stagiaire» ny fikarakaràna ny havan’izy ireo. Nambaran’ireo solontenan’ny fianakaviana fa efa hitan’izy ireo ho nahatsiaro ho sempotra ilay marary ary efa manala seraoma mihitsy kanefa dia mbola toy ireny milalao ireny ihany ireto mpiana-draharaha ireto. Ny herinaratra koa moa tsy milamina hatrany ary tsy tomombana ihany koa, araka izany, ny famatsian-drivotra na «oxygène» ho an’ilay marary. Tsy tana vokatr’izany rehetra izany ny ain’ny havanay, hoy hatrany ireto havan’ny maty ireto nanao antsoavo miantefa amin’ireo tomponandraikitra eo anivon’ny fitondràm-panjakàna hanara-maso ny fandraisana an-tanana itony marary eny anivon’ny hopitalim-panjakàna itony.

Nangonin’i J. Mirija