Fetin'ny fahaleovantena

Ho hentitra ny fitandroana filaminana eny amin’ny «Lac Iarivo»

Actualités
Talata 24 Jona 2025

Ho fanamafisana ny fiarovana ny ain’olona sy ny fananany mandritra ny ny fankalazana

ny fetin'ny fahaleovantena dia napetraka avokoa ny fepetra rehetra hiantohana ny filaminana, hoy ny fampitàm-baovao voaray teo anivon’ny fianakaviamben’ny tafika malagasy omaly. Hifantoka manokana amin’ny faritra manodidina ny «Lac Iarivo» ny mpitandro filaminana, indrindra fa amin'ny toerana hanatanterahana ny lanonana sy ny fandefasana afomanga, hoy ny fanazavàna. Handrindra tsy tapaka ny fifamoivoizana manodidina ny toerana izay voakasika rehetra izy ireo. Ho tapaka vonjimaika ny lalana manomboka eo amin’ny "rond-point" na fiolanana Tsarasaotra mankany amin’ny «Lac Iarivo» ka ny fiara sasany dia hiodina any Ankazomanga na mandalo amin’ny digy Ambohitrimanjaka. Ho an’ireo manodidina ny Lac Iarivo nefa mikasa hiverina kosa dia asaina mandalo amin’ny lalan-tany mivoaka any Soavimasoandro. Hisy famantarana sy marika manokana hapetraka eny an-toerana ary hisy koa ny toerana fametrahana fiara na «parking» izay hotarihin’ny mpitandro filaminana. Miisa manodidina ny 4000 ny mpitandro filaminana hiasa amin’io fotoana io. Tsy maintsy arahina ny toromarika rehetra napetraka satria tsy azo atao ambanin-javatra ny fiarovana ny filaminam-bahoaka. Marihina fa voarara tanteraka ny fandefasana «laser» amin’io andro io, hoy hatrany ny fampitàm-baovao.
Nangonin’i J. Mirija