Faritra Vakinankaratra

Miantso ny mpampiasa vola Koreana Tatsimo ho avy

Actualités
Zoma 04 Jolay 2025

Manana akora fototra maro isan-karazany i Madagasikara, ary manana tany

malalaka azo ambolena ihany koa. Ry zareo Koreana kosa dia manana ny traikefa ahafahana manodina sy manampy lanja amin’ireo vokatra ireo. Kely anefa ny taniny, ary vitsy ny mponina, ka rariny raha manokatra fiaraha-miasa amin’ny firenena tahaka an’i Madagasikara izy ireo. Efa miasa manerana izao tontolo izao ny Koreana ary mizara traikefa amin’ireo firenena mpiara-miombon’antoka aminy. Namporisika ny fitondrana koreana hampiasa ny volany eto Madagasikara ny Governoran’ny faritra Vakinankaratra, Atoa Vyvato Rakotovao, indrindra any Antsirabe izay ahitana ireo akora ilaina amin’ny famokarana. Misokatra ho an’ny firenena rehetra i Madagasikara, indrindra ho an’ireo hitondra fampandrosoana. Toy izany koa ny faritra Vakinankaratra. Ny faha-30n’ny volana lasa teo dia nanao fitsidihana tao amin’ny biraon’ny Governora ao Antsirabe ny Masoivohon’i Korea Atsimo, S.E. Ramatoa Park Ji Hyun. Sambany no nahatongavany tao Antsirabe. Noresahan’ny roa tonta ny momba ny fiaraha-miasa tokony hatsangana sy ny filàna hifanomezan-tanana. Naharitra ora iray sy sasany teo ny dinika. Taorian’ny fitsidihana dia nifampizara fahatsiarovana ny Governoran’ny faritra sy ny Masoivohon’i Korea Atsimo miasa sy monina eto Madagasikara.
Solotiana