Fanirisoa Ernaivo

Naverin'ny CSM ho mpitsara

Actualités
Talata 10 Martsa 2026

Niverina amin’ny toerany maha-mpitsara

indray Ramatoa Fanirisoa Ernaivo, izay Minisitry ny Fitsarana tao anatin’ny governemanta izay nitsahatra omaly. Io no fanapahan-kevitra vokatr’ilay didim-pitsarana navoakan’ny Conseil d’État, izay nampiantona ny “révocation” na fandroahana nataon’ny CSM (Conseil Supérieur de la Magistrature) tamin’ny taona 2019. Raha tsiahivina, ny 31 Oktobra 2018 no nanapaka-kevitra ny Minisitry ny Fitsarana tamin’izany fotoana hanajanona azy amin’ny maha mpitsara. Taorian’izay, ny 07 Novambra 2019, dia nesorin’ny CSM tanteraka tamin’ny asany izy. Tao anatin'ny fotoana naha sesin-tany politika azy tany Frantsa no nilatsaka ireo didy nandroaka azy ho mpitsara. Narahina didy fampisamborana Iraisam-pirenena taorian'ireo vesatra nanenjehan'ny Fitondrana Rajoelina azy ho manakorontana ny filaminan'ny Firenena. Tsy nanaiky anefa Ramatoa Fanirisoa, ka nitondra ny raharaha teo anivon’ny Conseil d’État. Ny valin’izany no mamerina azy amin’ny toerany maha-mpitsara, amin’ny laharana “troisième grade, deuxième échelon” izay efa niakatra ho “première grade” tokony ho izy amin’izao fotoana. Voalaza fa tokony hisy fanonerana avy amin’ny CSM, izay miandraikitra ny fitantanana ny asan’ny mpitsara, manoloana ny fotoana sy ny toerana very tamin’ny fanesorana azy. Misy moa ny manasokajy fa ny raharaha dia manamarika dingana lehibe eo amin’ny tantaran’ny fitsarana eto Madagasikara, satria mampiseho fa mbola manana lanja sy fahefana ny Conseil d’État amin’ny fanitsiana sy fanarenana ny didim-panjakana manohintohina ny zon’ny mpitsara. Ara-politika, somary manitikitika kely sy tsetsatsetsa tsy aritra ihany hoe : fifandrifian-javatra ihany ve ny fipariahan’ity fanapahan-kevitra namerina an-dRtoa Fanirisoa Ernaivo ity ho mpitsara nialohan’ny fampiatoana ny governemanta ?
Toky R