Fandrahonana mpitondra ambony?

Nidoboka am-ponja vonjimaika i Conan

Actualités
Alakamisy 05 Febroary 2026

Nidoboka am-ponja vonjimaika eny

Antanimora i Conan Christidy na Conan le Barbare, raha ny vaovao niparitaka omaly. Fanalam-baraka sy fandrahonana ho faty ny Filoham-panjakana na "diffamation et Menace de mort envers le chef d'État ", hoy ny vaovao miparitaka, saingy tsy mbola nisy tatitra mazava avy amin'ny fitondram-panjakana. Raha tsiahivina, ny faramparan'ny volana janoary teo, nitory an'i Conan i Stan'ley Ramarivelo noho ny ambarany fa fandrahonana ho faty sy filazan'ity farany ho afaka mibaiko ny PRRM ny tenany. Efa nisy ny karazana fampihavanana azy ireo, izay nifanditra tamin'ny resaka Fikambanana nandray anjara tamin'ny tolona. Somary mbola manjavozavo noho izany ny raharaha Conan le Barbare fa raha tena ireo vesatra voalaza sy miparitaka amin'ny fizaram-baovao samihafa dia mavesatra dia mavesatra ary sarotra ny lalan-kivoahany. Henjana izany fahasahiana milaza fa afaka mibaiko sy mandrahona Filoham-panjakana izany raha tena marina tokoa. Mbola misitraka ny zo maha mbola tsy voaheloka na "présomption d'innocence" ka afaka miaro tena anefa izy ka asa hanao ahoana ny tohiny. Voalaza moa hatreto fa tsy i Conan irery fa misy namany iray niaraka nidoboka aminy. Andrasana ny tohiny!
Toky R