Fandrahoana sakafo-Fifaninana eran-tany

Haneho ny fahaiza-manaony ireo solontena Malagasy

Actualités
Alakamisy 23 Janoary 2025

Hotanterahina anio Alakamisy 23 Janoary any Lyon France ilay

fifaninana iraisam-pirenena momba ny fandrahoan-tsakafo hiarahan’ireo Firenena miisa 12 manerantany. Anisan’ny voafantina handray anjara amin’izany i Madagasikara izay fantatra fa manana solontena miisa 2 sy mpanazatra iray, tarihin’i Sefo Lalaina. Andiany fahasivy izy ity raha tsiahivina karakarain’ny Confederation international des charcuteries et des traiteurs. Anisan’ny hiadivana mandritra izany ny amboara iraisam-pirenena ho an’ny fandrahoan-tsakafo ka ankoatra ny fahaiza-manaon’ny mpandray anjara dia anisan’ny hojerena amin’izany ny fahaizany mamorona sy ny fanavaozany hatrany ny vokatra hatolotr’izy ireo. Tsiahivina moa fa firenena matanjaka avokoa no handray anjara amin’ity fifaninana ity toa an’i Japon, Italie, Singapour, Tcheque….Manantena ny hibata ny amboara amin’ity fifaninana ity moa ireo ekipam-pirenena Malagasy izay tsiahivina fa efa fanin’efany izao no nahavoafantina an’i Madagasikara handray anjara ao anatin’izany.
Pati
Legende : Mitarika izany any Lyon France ny sefo Lalaina izay tsy zoviana amin’ny maro intsony !