Fanatanterahana ny hetsika Tazana

Misisika mafy ny Antso fiarahamonina Kristianina

Actualités
Alakamisy 11 Aprily 2024

Na dia nanao fanambarana aza ny antoko politika Natiora fa ahemotra amin’ny fotoana manaraka ilay hetsika antsoina hoe Tazana

izay kasaina ho atao ny 12 aprily izao eny amin’ny Espace Tazana Alasora dia misisika mafy ho amin’ny fanatanterahana izany amin’io andro io ihany ny fikambanana Antso fiarahamonina Kristianina na AFK. Araka ny fanazavan’ny filohan’ity fikambanana ity, Ricky Andriamparany, tamin’ny antso an-tariby omaly dia efa nahazo alalana ny hetsika ka ho tontosaina ihany. Tsiahivina fohy fa velankevitra momba ny hoe «Ahoana ny fahitanao ny hoavin’i Madagasikara, hamirapiratra be ve sa tsy misy ho antenaina?» no ho tontosaina amin’io fotoana io. Ny antoko Natiora, izay mpiara-mikarakara ny hetsika, kosa moa tetsy ankilany dia nanamafy tamin’ny alalan’ny filohany, Mihari-Ni-Rencho, fa tsy mbola handray anjara amin’ny hetsika fa miandry ny fotoana heverina fa ahafahana manatontosa izany milamina kosa.
J. Mirija