Actualités

Fanaovana maloto ankalamanjana Efa mihatra ny sazy eto Antananarivo

Actualités
Talata 06 Oktobra 2020

Efa mihatra ny fitsipi-dalàna momba ny fikoloam-pahasalamana na CMH eo anivon’ny Kaominina Antananarivo. Efa amperin'asa ny mpijoko ireo mpivalan-drano ankalamanjana.

Tsy misy azo ialana hoe olombelo tsy akoho, fa avy hatrany dia voafaoka mankany Anosipatrana mandoa vola, raha tsy izany tonga dia miditra “violon”. Efa niely tany amin’ny tambajotran-tserasera ny fampahafantarana avy amin’ny olona voalaza fa efa tratra nampiseho ny rosia nandoavam-bola 5 alina ariary sazy. “Tamin’alahelo no nanomezako azy an’io vola io satria izaho tsy nahafantatra an’io vaovao io, ka tampoka tamiko ary tena poritra tsy zaka intsony dia natao teo. Tsara ilay izy, fa tokony mba ampitomboina ny “WC Public” tompoko satria tamin’ny toerana nahatrararana ahy tsisy na toeram-pivoahana na toeram-pidiovana…”, hoy ny fitantarana. Adihevitra tsy hifankahitana ny CMH, izay mety misy ny lafy tsarany sy lafy ratsy azo iadian-kevitra na ahitsy. Efa lalàna hatramin’izay kosa ny tsy fanaovana maloto ankamanjana, izay tokony tsy hatao na aiza na aiza. Mila fepetra manokana toy ny fametrahana toeram-pivoahana anefa na izany aza. Mila fahatsapan-tena avy amin’ny tsirairay, fa raha handrasana hosaziana sy atao andrimaso vao hanaja ny fahadiovana isika, dia tsy handroso na afaka 100 taona aza.

Toky R