Actualités

Partagé sur :
• facebook

Noho ny fampihorohoroana azy tamin’ny alalan’ny trakta sy fandrahonana mpitondra ambony azy am-bava mba hampiato ny fitokonan’ny mpiasan’ny kompania Air Madagascar dia nametraka fitoriana fiandry teny amin’ny fitsarana Anosy ilay mpanamory fiaramanidina Rado Rabarilala izay sady mpitondra tenin’ny mpiasa mitokona.

Momba ny  fitokonana indray dia nanamafy i Rado Rabarilala fa tsy  hijanona hitaky  izy ireo  raha tsy tanteraka ny  fitakiany  rehetra dia ny fijerena ny zon’ny mpiasa  voahosihosy toy ny  tsy fandoavana ny latsakemboka Cnaps sy ny tsy fandoavan’ny orinasa ny hetran’izy ireo, indrindra fa ny fialan’ireo tompon’andraikitra  izay heverin’izy ireo  fa tsy mahomby ka mitarika ny fahapotehan’ny orinasa Air Madagascar. Omaly dia nisy zotra  enina no voalahatra fa handeha teny Ivato, anisan’izany ny zotra nihazo an’i Marseille sy Guangzhou saingy mpanamory fiaramanidina fiandry sy mpiasa  nohafarana avy tany  Maorisy  avokoa no  nantsoina nanatontosa ny  asa teny an-toerana.  Tamin’ny ora farany anefa dia fantatra  fa tsy lasa indray ilay  fiaramanidina  tokony ho any Marseille satria tsy nisy mpiasa  nety nanaraka ilay fiara. Ny praiminisitra  lehiben’ny governemanta  moa dia  efa nampanantena  fa hilamina ity raharaha Air Madagascar ity kanjo  toa vao mainka  hihamafy. Ny tsy  fandroahana  ireo mpiasa  naato tamin’ny asany no sanda  nomen’ny praiminisitra  ny mpiasan’ny  Air Madagascar mba hiverenan’izy ireo  miasa ka tsy  neken’ireto farany izany satria  tsy izany velively no notakian’izy ireo.

Andry Ratovo  

Tia Tanindrazana

Samia mijoro ho an'i Gasikara.