FAMPANAJANA NY ZON’NY ANKIZY

Partagé sur :
• facebook

Mbola tena lavitra isika eto Madagasikara manoloana ny fampanajana ny zon’ny ankizy.

Raha araka ny antontan’isa voaray farany mantsy dia ny 47%-n’ireo ankizy latsaky ny 18 taona no efa mamelona ny fianakaviana vokatry ny fahantrana. Ankoatra ny asa an-trano dia marobe ireo miasa mitaom-biriky, mikapo-bato, matsaka ranon’olona, mitrandraka harena an-kibon’ny tany, mihira sy mangataka eny amoron’arabe….Ireo ankizy zanaky ny fianakaviana sahirana no tena voakasik’izany amin’ny ankapobeny hany ka tsy misy miditra amin’ny sainy intsony ny fianarany na dia mbola misy ihany aza ireo afaka manohy izany. Betsaka ireo ankizy very zo vokatr’izany eto amintsika. Raha tsiahivina kely anefa dia manan-jo ny hianatra,ny hisakafo ara-dalana, ny hotsaboina raha marary….ny ankizy iray. Adidin’ny Ray aman-dReny avokoa no manao izany izay lasa mifanamadika tanteraka ankehitriny. Nankalazaina omaly Alarobia 20 Novambra ny andro manerantany ho an’ny ankizy. Tany Mahajanga no nanamarihana izany izay nosantarina tamin’ny filaharambe mamakivaky ny tanana notanterahin’ny ankizy. Ankizy an-jatony no tonga nandray anjara tamin’izany. Narahin’ny hetsika fizaham-pahasalamana maimaim-poana ho an’ny ankizy sy fampianarana azy ireo mahandro sakafo izany. Nivoitra nandritra ny kabary nifandimbiasan’ireo manam-pahefana moa fa vonona izy ireo ny hifanome tanana hamerenana amin’ny laoniny izay fampanajana ny zon’ny ankizy eto Madagasikara izay ho fitsinjovana ny ho avin’izy ireny.
Pati
Legende : Efa miasa mamelona ny tenany tahaka izao ny ankamaroan’ireo ankizy eto Madagasikara !

Tia Tanindrazana

Samia mijoro ho an'i Gasikara.