Actualités

Famindran-toeran’ny minisiteran’ny Fitsarana Anjaran’ireo lehiben’ny mpiraki-draharaha indray izao

Actualités
Alakamisy 10 Septambra 2020

Nanamafy ny avy amin’ny Minisiteran’ny Fitsarana izay tarihin’ny Minisitra Jhonny Richard Andriamahefarivo omaly, fa miroso ho any amin’ny fanatsarana

hatrany ho famerenana ny hasina sy ny fitokisan’ny vahoaka. Anjaran’ireo Lehiben’ny Mpiraki-draharaha (Chef de Greffe/Greffier en chef) indray izao no mifindra toeram-piasana (affectation). Efa mivoaka izao ny lisitra ho azy ireo. Izao dia tohin’ny ezaka efa natomboka tamin’ny famindrana toeram-piasana ho an’ireo Mpitsara, taorian’ny fivorian’ny Filan-kevitra Ambonin’ny Mpitsara na ny CSM. Tsiahivina fa nisy ny fandefasana antso teny anivon’ny sampam-pitsarana sy Tribonaly isan’ambaratongany. Rehefa tapitra ny fandinihana ireo antontan-taratasy voaray tamin’ireo kandidà, dia nofaranana ny lisitra. Misy ireo hifandimby toerana (rotation), maro ireo olona vaovao, ary eo ihany koa izay ho voatazona amin’ny toerany ihany. Tsara ny manamarika fa anjaran’ny eo anivon’ny Fandraharahana ny Fonja indray no dingana manaraka amin’izao fanatsarana ny tontolon’ny Fitsarana eto Madagasikara izao, hoy ny fampitam-baovao.

Toky R