Delestazy tsy mety voavehy

Miitatra ny famotehana entiny!

Actualités
Talata 26 Aogositra 2025

Fara-faha keliny, 16 taona no niandrasana ny fitondràna Rajoelina sy ny forongony

hamahana ity delestazy tsy mety voafehy eto amin’ny firenena ity. Tao ireo nampanantena ny hamaha izany anatin’ny 6 volana. Ny an’ny filoham-pirenena ankehitriny moa nandritr’izay fotoana naha lany filoham-pirenena azy izay, fa tsy filohana tetezamita intsony na filohana antoko politika nanolotra kandidà lany filoham-pirenena, dia nivadibadika teny hatrany ny voalaza, hany ka tsy hita intsony hoe ilay «voavaha afaka 3 volana» ve no tokony ho raisina sa ilay «7 volana» sa ilay mbola amin’ny 2028? Mandra-piandry izany rehetra izany dia hita ho miitatra hatrany ny famotehana entin’ity fahatapahan’ny herinaratra lavareny na delestazy ity. Tsy misy izay tsy mitaraina, mimenomenona, sorena manoloana izany toe-draharaha, izay tsy vitan’ny hoe manimba fihariana fotsiny fa, sady tsy voafehy no mbola manampy ny fahasimban’ireo fitaovana ihany koa. Na ireo fitaovana efa namboarina sy ny soloina aza simba indray. Fitarainan’ireo mpivarotra enta-madinika izany, fitarainan’ireo mpanefy vy, fitarainan’ireo mpanao volo, hatramin’ireo orinasa goavana izay efa manana fahafahana hampiasa solona herinaratra na «groupe électrogène» aza. Ny lera anaty fampandrenesana fanapahana, izay efa tsy rariny amin’ny maha mpanjifa tsy maintsy mandoa faktiora, amin’io mbola tsy voahaja ihany koa. Ny finiavana hamaha ny olana ve izany no tsy misy sa ny fahaizana ahafahana mamaha tanteraka izany mihitsy?
J. Mirija