BATERIA NIPOAKA

Tokantrano iray kila forehitra tao Ambatondrazaka

Actualités
Talata 03 Jona 2025

Nisehoana haintrano mahatsiravina koa tany amin'ny Fokontany Ambodiakondro,

kaominina sy distrikan'Ambatondrazaka omaly Alatsinainy 02 Jona folakandro. Tokantrano iray no lasibatra tamin'izany ka may kila hotohoto avokoa ireo entana tao anatiny. Raha araka ny loharanom-baovao azo dia vokatry ny fipoahan'ny bateria tao amin'ity tokantrano ity no niandohan'ny afo. Mampiasa irony panneau solaire irony mantsy izy ireo mba hahazoana herinaratra isan'andro. Ny mpiara-monina no niara-nirodorodo tamin'ny tompon-trano namono ny afo. Na izany aza tsy nisy ny aina nafoy na ny naratra. Ny tena nampalahelo tamin'ity tranga ity dia lasa lavenona tao anatin'ny indray mipy maso avokoa ny entana nohariana an-taonany maro izay mitentim-bidy am-polony tapitrisa. Manginy fotsiny ny vola sy ny firavaka izay notanisain'ny tompony intsony. Tsiahivina moa fa vanim-potoana mampahazo vahana ny haintrano ihany koa ny vanim-potoanan'ny ririnina tahaka izao ka ilana fitandremana. Tafiditra ao anatin'izany ny fampiasana labozia ateraky ny delestazy lavareny isan-kalina.
Pati
Légende : Lasa lavenona tahaka izao avokoa ny entana tao amin'ilay tokantrano !