Actualités

Antetezambaro Toamasina II Napetraka ny toerana lehibe famokarana zana-kazo

Actualités
Alarobia 14 Oktobra 2020

Mihena tsikelikely ny velaran'ny alan'Atsinanana noho ireo tsindry mahazo azy toy ny doro ala, fanapahana hazo sy ny fitrandrahana tsy maharitra ny harena voajanahary ao aminy.

Mitana anjara toerana lehibe eo amin'ny fiarovana ireo karazan-javamanan'aina mampiavaka an’i Madagasikara anefa ny fisian'ny alan'Atsinanana. Mila fandraisana andraikitry ny tsirairay ny fanarenana azy mba ho fiarovana ireo rohi-piaina ao aminy. Fambolen-kazo mitsinjo lavitra sy mamaly ny filàn'ny mponina no tanjona amin'izany. Jerena manokana ireo karazan-kazo tsy manimba ny nofon-tany ary azo trandrahina ho an'ny fiharian'ny mponina ihany koa, toy ny famokarana lohamenaka, fiompiana tantely, fanamboarana fanafody,... Tombony mivantana ho an'ireo mponina ifotony ny fametrahana tanin-janakazo manakaiky ny tanànan'izy ireo, ka toerana mamokatra hatramin’ny 5 000 zana-kazo isaky ny “plate-bande” no napetraky ny Fitalevam-paritry ny tontolo iainana na DREDD Atsinanana ao amin'ny fokontany Ampandroantsiriry, Kaominina Ambanivohitra Antetezambaro, Distrikan'i Toamasina II. Tanjona ny hametraka “plate-bandes” manodidina ny 375 isa ao an-toerana, hoy ny Minisiteran’ny tontolo iainana.

Toky R