Actualités

Partagé sur :
• facebook

Mitodika eny Tsimbazaza ankehitriny ny mason’ny mpanara-baovao maro. Dinihina eny mandritra izao fotoam-pivoriana tsy ara-potoana faharoa izao mantsy ilay lalàna fehizoro momba ny fitsinjaram-pahefana

ary voaresaka manokana ao anatin’izany ny ho fizarazana an’Antananarivo renivohitra. Vao noresahina nandritra ny fikaonandoham-pirenena teny amin’ny CCI Ivato io fikasan’ny fanjakana hizarazara an’Antananarivo io dia efa nahabe resaka. Nanomboka teo dia efa nanao ranolava ny fanambarana fanoherana izany, na avy amin’ny olontsotra mponin’Antananarivo io na avy amin’ny antoko politika. Manohitra ny hizarana an’Antananarivo ny antoko Taniko Madagasikara. Mitsipaka tanteraka izany koa ireo mpikambana ifoton’ny Tiako I Madagasikara ary miantso ireo solombavam-bahoaka enina mianadahy voafidy tamin’ny lisitra Movansy Ravalomanana tsy hifidy io volavolan-dalàna mampizarazara an’Antananarivo io. Nahitsy koa ny tenin-dRatsivalaka Michèle, depiote voafidy avy amin’ny lisitra MAPAR tao amin’ny Boriborintany Voalohany, omlay mitsipaka marindrano io fizarazarana an’Antananarivo io. Nodinganin’ny fanjakana anefa ny vahoakan’Antananarivo renivohitra, tsy mba nakana ny heviny momba io fikasana io, fa nisafidy ny hitondra avy hatrany ilay volavola eny Tsimbazaza. Mazava ny tiana hahatongavana, dia ny hankatoavin’ny solombavam-bahoaka ambongadiny azy io noho ny kajikajy politika. Eo no mipetraka ny fanontaniana, hanaovana angaredona ve izany ireo depiote 12 voafidy teto an-drenivohitra, ka ireo depiote avy any amin’ny Faritra, izay mandalo fotsiny ihany no eto, no hanapaka ny hoavin’Antananarivo ?

Tia Tanindrazana

Samia mijoro ho an'i Gasikara.