Andron’ny vehivavy

Partagé sur :
• facebook

Ny vehivavy no manampy be indrindra ny fampandrosoana ny kaominina»

Noho ny fanarahana ny lamina napetraky ny fitondràm-panjakàna mikasika ny fanamarihana ny andron’ny vehivavy dia ny sabotsy 14 martsa teo vao nanao ny anjaran’ny ho fanamarihana izany ireo vehivavy monina ao amin’ny kaominin’Antehiroka. Ireo vehivavy anaty fikambanana anivon’ny kaominina, ireo vehivavy miasa anivon’ny fiadiadiana ny kaominina, vondrom-behivavy samihafa no nandray anjara tao anatin’izany. Tsy maintsy miezaka izahay eto anivon’ny kaominina, hoy ny ben’ny tanàna ao an-toerana, Toky Harilanto Rakotoharivelo, manohana ireo reny sy ray aman-dreny ny amin’izay rehetra atao ahafahan’izy ireo miatrika ny fiainana tsy mintaintaina firy intsony. Ankasitrahana hatrany, hoy izy, ireo mpiara-miasa hatramin’izay tamin’ny fanampiana ny fikambanam-behivavy teto amin’ny kaominina sy ireo marefo. Miantso ireo orinasa mba hijery manokana ny vehivavy satria matetika tsy mahazo asa ny vehivavy mifaninana amin’ny lehilahy. Izany indrindra no anton’ny ezaka atao amin’ny fanomezana fiofanana ireo vehivavy ka iangaviana ireo tomponandraikitra tokony hijery ny ezaka ataon’ny vehivavy. Ny vehivavy no manampy be indrindra ny fampandrosoana ny kaominina, indrindra, amin’ny fampianarana ny olona ny fanadiovana. Ato ho ato dia tena hirosoana izany, hoy hatrany ity ben’ny tanàna ity.
J. Mirija

Tia Tanindrazana

Samia mijoro ho an'i Gasikara.