Andro iraisampirenena ho an’ny tenindreny

Hanao fankalazàna amin’ny fomban’ny siantsa ny ITAZOMA

Actualités
Alarobia 19 Febroary 2025

Feno 25 taona ny nanokanan’ny UNESCO ny 21 febroary ho andro iraisampirenena

ho an’ny tenindreny io daty io. Hankalaza io andro jobily io ny Ivon-toeram-pikarohana momba ny arika sy zavatra ary olona malagasy na ITAZOMA ao amin’ny Fakiolten’ny teny aman-tsoratra ary siantsan’ny mahaolona ao amin’ny oniversiten’Antananarivo, hoy ny fampitam-baovao voaray omaly. Fankalazana amin’ny fomban’ny siantsa amin’ny alalana vela-kevitra miompana amin’ny lohahevitra hoe “Tenin’ny tany: Antoky ny fanabeazana mahomby, fototry ny fandrosoana mateza” no hatao amin’izany. Zana-dohahevitra hovoaboasana kosa ny hoe «Ny fanabeazana amin’ny tenindreny», «Ny fampitana kolontsaina amin’ny tenindreny», «Ny serasera amin’ny tenindreny». Ao amin’ny Amphi-DEGS, ny zoma 21 febroary 2025 ho avy izao no fotoana. Amin’ny 8 ora sasany ny lanonam-panokafana. Famelabelaran-kevitra ravahana seho kanto no ho tohin’ny fandaharam-potoana, hoy hatrany ny fampitam-baovao voaray.
Nangonin’i J. Mirija