Actualités

Toeram-pisotroana efa falehan’ireto zandary ireto ity nitrangan-javatra nanakorontana fiarahamonina tao Andoharanofotsy ity. Mitondra galona Adjudant sy GP1 na kilasy voalohany ireto zandary ireto. Teo am-pisotrosotroana dia mandeha ny adihevitra politika. Nisy ny tsy nahazaka ka dia nampiaka-peo ary niteraka fifamaliana tamin’ny tompon-trano, izay vehivavy. Tsy niato izany ka tonga hatrany amin’ny fikasihan-tanana sy fandrahonana tamin’ny basy “kalach”. Nirefotra tokoa ny basy. Bala tena izy no nampiasan’izy ireo. Mbola tavela tao an-tranon’ilay niharam-boina ny sisam-bala. Soa fa tsy nisy olona voa ! Niantso namana ilay mpivarotra. Tonga tokoa izany, ary nanontany ampahatsorana ireo zandary amin’ny anton’ny fifanolanana ka mahavoakasi-tanana ilay ramatoa mpivarotra. Poa tahak’izay koa dia nitangorona ny olona. Toa vao mainka naharomotra ireto zandary anefa ny fahatongavan’ny naman’ilay mpivarotra, izay tsy nampoizin’ireo nandrahona fa mpanao gazety sy ny olona teo an-tanàna. Voakasi-tanana sy voarahona tamin’ny basy izay rehetra teny anoloan’izy ireo. Izy ireo rahateo mirehareha ho mpanao haiady ikoizana, ary tsy nihambahamba naka an-keriny ny findain’ilay mpanao gazety, saingy tsy azony izany. Mampitaraina ny mponina eny Andoharanofotsy eny ny fihetsik’ireto zandary ireto. Tsy vao izao no nisiana asa fampihorohoroana ataon’izy ireo, araka ny fitantaran’ny niharam-boina teny an-toerana. Mandefitra ny olona noho ny hery tsy mitovy. Hitondra ny raharaha eny anivon’ny manam-pahefana ireo niharam-boina ka dia ho hita eo ny tohiny.

 

Nangonin’i Jean D.