AMBOHIMANDROSO

AMBAVAHADITOKANA Maika ny fanamboarana ny vanona hifehezana ny rano

Actualités
Talata 19 Aogositra 2025

Fokontany iray amin'ireo 6 isa misy ao anatin'ny Kaominina ambanivohitr'Ambavahaditokana,

distrikan'Atsimondrano ny Fokontany Ambohimandroso. Mampiavaka azy ny fahafahan'ireo tantsaha mpamokatra ao aminy mamboly vary indroa mandritra ny taona raha ampy ny rano. Tamin'ity taona 2025 ity anefa dia tsy nisy izay tsy nikaikaika fa tsy ampy ny rotsak'orana hahafahana tena namokatra ara-dalana, antony manosika azy ireny hitady hevitra. Maika araka izany ny fanamboarana ny vanona ho enti-mifehy ny rano ho an'ity Fokontany iray ity. Tsy ho an'ny Fokontany izay tantanako ihany izany hoy Randriamifidison Richard fa ho an'ny lemak'Ambavahaditokana manontolo mihitsy. Tonga nihaona tamin'ny Ben'ny tanana Ratoetrarinanja Jean Louis ity sefom-pokontany ity omaly nitondra ny hetahetan'ny mponina sy nitantara ireo olana sedrainy hafa ihany koa. Anisan'ireny ny ampahan-dalana izay mbola tsy vita ao Ambohimandroso ka mamotaka rehefa fotoam-pahavaratra. Toraka izany koa ny rano fisotro madio vatsian'ny Jirama izay tapatapa-dava.
Pati
Légende : Randriamifidison Richard, sefom-pokontany ao Ambohimandroso !