Afera Boeing 777

Miara-miasa amin’i Maurice sy ny FBI ny Fanjakana Malagasy

Actualités
Talata 02 Desambra 2025

Raha nanapa-kevitra nandefa

an’i Mamy Ravatomanga any amin'ny fonjan'i Melrose ao Maorisy ny Fanjakana ao Port-Louis omaly 01 desambra 2025, dia manohy ny fiaraha-miasa mikasika ireo dosie momba azy kosa ny Fanjakana Malagasy, raha ny resaka nataon’ny Minisitry ny Fitsarana tamin’ny RFI omaly. Miara-miasa amin’i Maurice sy ny FBI mikasika ny boeing 777, ary namerina ny fanadihadiana lalina. Efa nanaovana fampanantsoana i Valery Ramonjavelo Minisitry ny fitaterana teo aloha, saingy milaza ny mpisolovava azy fa tsy mahefa hanao fanadihadiana azy ny PAC (Pôle Anti-corruption), hoy Rtoa Fanirisoa Ernaivo Minisitry ny Fitsarana. Efa novalian’ny Fanjakana fa araka ny andininy faha-134 amin’ny lalàmpanorenana, ny heloka sy fandikan-dalàna ivelan’ny asa maha minisitra na voalaza aza fa ny HCJ (Haute Cour de Justice) no mitsara azy, dia azo atolotra amin’ny fitsarana tsotra tsy mandalo HCJ. Miandry amin’ny fanatanterahana an’izay, ary mbola betsaka no handalo famotorana lalina eo anivon’ny PAC, raha ny fanazavany. Manana fifandraisana amin’ny manam-pahefana sy ny ACM izay nahazoany 5 tapitrisa euros ny fahafahana namoaka laharana vonjimaikan’ireo fiaramanidina 5, raha ny nambaran’ny fampahalalam-baovao Maorisianina. Misy olona 2 tena « clés » tamin’io dosie io, fa mbola tsy avoaka ny anarany, hoy i Fanirisoa Ernaivo. Manao ny dingana rehetra hanamafisana ny fanenjehana an’i Mamy Ravatomanga amin’ny fitoriana azy atsy Maurice ny Fanjakana Malagasy, raha ny fanamafisany. Ity Minisitra ity izay naneho fa tototry ny dosie izay tsy azo nokitihina fony Rajoelina teo amin’ny fitondrana ny Fanjakana ankehitriny, ka isan’ny goavana ny raharaha Mamy Ravatomanga, izay nifehy sehatra maro teto. Voatontontonona ihany koa tamin’izany ny resaka angovo. Milaza ny Minisitra fa mbola tsy afaka miteny hoe eny na tsia raha mikasika ny Jirama fa nisy kosa ny Fanjakana ratsy tantana, ary mandeha ny « audit » hijerena ny tena tompon’antoka. Momba ny fahatafidiran’i Mamy Ravatomanga ao anatin’io na tsia, dia nilaza izy noho izany fa mbola tsy eo ambany masony ny dosie, fa betsaka kosa ny orinasa mety voakasika raha ny mikasika ny Jirama.
Toky R