Fandriampahalemana

Zandarimariam-pirenena Tsy natao fieren’ny jiolahy

Fandriampahalemana
Zoma 08 Septambra 2017

Nitohy tany amin’ny faritr’i Betsiboka ny bemidina tanterahin’ny zandarimaria, ka tao Tsaratànana no notontosaina.

Tanjona ny hamerenana ny fahatokisan’ny vahoaka ny zandarimariam-pirenena sy hametrahana fandriampahalemana maharitra. Ny Jeneraly Andriamanana Solofonirina Maherizo, talen’ny serasera sy ny fifandraisana amin’ny any ivelany ao amin’ny sekretariam-panjakana miadidy ny zandarimaria sy ny Jeneraly Miasa Manohizara Toussaint, talen’ny fifandraisan-davitra sy fampitam-baovao eo anivon’ny fibaikoana ny zandarimaria no nitarika ny delegasiona avy aty Antananarivo. Nanatrika izany ihany koa ireo tompon’andraikitry zandarimaria ao anatin’ny faritra Betsiboka, Sofia, ary Alaotra Mangoro, ka nisy ny fikaonan-doha notontosain’ireo niaraka tamin’ny tompon’andraiki-panjakana tao an-toerana ahafahana mandrafitra ny paikady mifanaraka amin’ny filan’ny vahoaka any ifotony. Nohararaotina io fotoana io nampatsiahivana sy nanentanana ny eny ifotony ireo hanefa ny adidiny amin’ny fampitana ny vaovao amin’ny mpitandro filaminana, ireo toe-javatra mety mitarika ny tsy fandriampahalemana. Nanome toky ny vahoaka kosa ireo tompon’andraikitra avy amin’ny zandarimariam-pirenena ireo fa vaindohan-draharaha ny fanadiovana ny ato anatiny satria tsy natao fieren’ny jiolahy na mpanao ratsy ny zandarimaria.

Toky R