Fandriampahalemana

Zandarimaria Malagasy-Frantsay Mihamafy hatrany ny fiaraha-miasa

Fandriampahalemana
Zoma 13 Aprily 2018

Nanao fitsidihana ny foibem-pibaikoana ny zandarimariam-pirenena tao amin’ny Toby Ratsimandrava omaly 12 aprily maraina ny Général de Brigade Xavier Ducept, Komandin’ny zandarimaria ao amin’ny Nosy La Réunion.

Nandray azy tamin’izany ny jeneraly lefitra voalohan’ny Komandin’ny Zandarimaria, izay nisolotena ny komandy ambonin’ny zandarimaria, izay mbola namita iraka. Nifototra betsaka tamin’ny fanamafisana ny fiaraha-miasa efa misy ny votoatin-dresaka. Nisy ny fanolorana tamin’ny fomba ofisialy ireo fitaovana ara-teknika ilaina amin’ny fikarohana ny asa fandikan-dalàna, ary koa kojakoja maro ilaina amin’ny fiarakodia. Nisy ihany koa ny fifanolorana mari-pahatsiarovana. Nanohy ny fitsidihana nataony teto teny amin’ny tobim-pibaikoana ireo Vondrona manokana eny Ivato io manamboninahitra Frantsay io ny tolakandro, nialoha ny niondranany nitodi-doha any La Réunion. Mitombo ary mihatsara hatrany ny fifandraisana arak’asa eo amin’ny zandarimaria Frantsay sy Malagasy. Tanjona hapetraka ho an’ny zandarimariam-pirenena eto Madagasikara ny hipakan’ny vokatry ny asa aterak’izany amin’ny vahoaka mba hahatanterahan’ilay hoe “Tanindrazana sy lalàna”.

Toky R