Fandriampahalemana

Vono olona tao Imerintsiatosika Mpiara-mibizina no nahavanon-doza

Fandriampahalemana
Alarobia 29 Aogositra 2018

Olona telo no nosamborin’ny zandary avy ao amin’ny “Groupement” ao Itasy noho ilay vono olona mahatsiravina namoizana ain’olona telo,

hita faty ny marainan’ny alatsinainy teo. Lehilahy iray no tena ahiahiana ho nandray anjara mivantana tamin’ny famonoana, raha ny fanampim-baovaon’ny Zandarimariam-pirenena. Nandeha ny fikarohana ary nisy ny tsara sitra-po nanome vaovao nahafaha-nisambotra azy io omaly maraina. Tsy nisy mihitsy ny diana vakitrano. Fantatra tamin’izany fa tsy maintsy olona niditra tao an-trano ary mahalala azy ireo tsara no nahavanon-doza satria raha ny hidin-trano mafy tsara, dia tsy azo vahana avy any ivelany izy io, hoy ny zandarimaria. Rehefa nandeha ny fikaroham-baovao, dia nisy olona naman’izy ireo akaiky ahiahiana ho tompon’antoka. Mpiara-manao bizinesy amin’ilay lehilahy ary misy resaka ara-bola voalaza fa tsy nifanarahana. Rehefa nosavaina ny tranony, dia nahitana akanjo sy pataloha, ary kiraro nihosin-drà. Notazonina hatao porofo aloha ireo, ary notazonina vonjimaika any amin’ny fonjan’Arivonimamo io noho ny tahotra ny hisian’ny fitsaram-bahoaka. Mitohy hatrany ny fanadihadiana sy ny fikarohana ireo olon-dratsy sasany. Tonga omaly hariva tany Sandrandahy, distrikan’i Fandriana ny nofo mangatsiakan’i Nantenaina sy Julianna Rakotorahalahy ary ny zanany kely, ka anio alarobia no handevenana azy ireo, izay vao erotrerony kanefa namoy ny ainy noho ny hetraketrak’ireo tsivalahara.

Toky R