Fandriampahalemana

Vokatry ny tsy fandriampahalemana Hihazakazahana ny fanamboarana « grille de protection »

Fandriampahalemana
Alakamisy 03 Mey 2018

Mirongatra sy mahazo vahana hatrany ny tsy fandriampahalemana eto amintsika. Vao tamin’ny talata, ohatra, dia toerana fakana sy fanaterana vola iray teny Ankadindramamy no notafihina jiolahy tsy misaron-tava roa mitondra môtô ka lasany tamin’izany ny vola 3 tapitrisa Ar.

Tsy misy izay tsy mihorohoro ny rehetra, antony tena mampandeha be ny asan’ireo mpanamboatra « grille de protection » eto amintsika ankehitriny. Ankoatra ireo ivontoerana fakana sy fanaterana vola ireny dia tokantrano telo isan’andro raha kely no tonga manatona azy ireny mampanamboatra vavahady na varavarana na koa fiarovana ny varavarankely. Tsy mihoatra ny 50.000 Ar anefa ny zakan’ny tokantrano iray amin’ny fanamboarana grille de protection ho an’ny varavarankely iray araka ny fanadihadiana natao tetsy Anosy. Noho ny fahasahiranana mianjady amin’ny tokantrano Malagasy avokoa no antony saingy tsy maintsy manokam-bola ny ankabeazany hahafahana miady amin’ny firongatry ny asan-dahalo. Eo an-daniny, voatery miditra fatiantoka na tsy manao mihitsy ireo orinasa kely manana traikefa amin’ity asa iray ity noho ny halafosan’ny vidin’ny vy. Miakatra andro aman’alina ihany koa mantsy ny vidin’ireo kojakoja fanamboaran-trano tato ho ato.

Pati