Fandriampahalemana

Seranan-tsambon’i Toamasina Nanjavona ny fanafody iray kaontenera

Fandriampahalemana
Alarobia 11 Aogositra 2021

Fanafody iray kaontenera nanjavona tao amin’ny seranan-tsambo any Toamasina, araka ny fampilazana fahaverezana entana nataon’ny Office Pharmaceutique Malgache na OPHAM,

izay orinasa mpamongady fanafody. Very tao amin’ny seranan-tsambo ny 5 aogositra 2021 izany. Manao antso avo amin’izay manam-baovao mety hahitana io kaontenera io ity orinasa ity, izay efa nifanaraka tamin’ny manampahefana ara-pahasalamana. Miisa 1360 baoritra ireo fanafody ireo ary misy ny marika DESKA. Toy izao ny fitsinjarany: Amoxicilline Gélules Lot: 70621037/36/37/38/39/40/41 izay ho lany daty amin’ny volana martsa 2024; Ampicilline Injectable Lot: 586210306 ho lany daty amin’ny martsa 2024; Ibuprofen Comprimés Lot:B01201201 ho lany daty amin’ny desambra 2023; Peniciline G Injectable Lot:675210304/05 ho lany daty amin’ny martsa 2024. Amin’ny ankapobeny dia antibiotique sy fampitoniana fanaintainana ireto fanafody iray kaontenera nanjavona tany Toamasina ireto. Zavatra tsy fahita izany afera sy halatra kaontenera izany, fa fanondranana an-tsokosoko no mety misy, na lavanty an’ireo entana tsy misy maka na tsy nahaloa haban-tseranana, fa tsy dia fandre firy ny toa ity indray mitoraka ity.
Toky R