Fandriampahalemana

Sabotsin’Antongona – Imerintsiatosika Manao izay tiany ny andian-jiolahy mpangalatra moto

Fandriampahalemana
Alatsinainy 06 Novambra 2017

Manao antso avo amin’ireo manampahefana sy tompon’andraiki-panjakana ny mponina ao amin’ny fokontanin’i Sabotsin’Antongona – Imerintsiatosika fa mahatsiaro iharan’ny tsindry hazo lena.

Mitaraina ireo mponina fa misy andian-jatovolahy ao anatina tambajotra mpangalatra moto ao an-tanàna ka lasibatra avokoa ireo izay manana, ny moto anefa no fitaovam-pitaterana tena miasa any ambanivolo sady nanatontonan’ny olona maro ny volany ary hiasana ihany koa. Lasibatra hatramin’ny pastera sy ny mompera, hoy izy ireo. Fantatra ireo mpangalatra, nisy ny fitoriana natao efa hatry ny ela saingy ny mampalahelo dia afaka foana ireo ambara fa tambajotran-jiolahy mpangalatra sy mpanao aferana moto ireo. Nisy ny halatra nitranga ny 1 novambra teo ary dia nitory ilay olona. Efa mandeha sahady indray anefa ny fandrahonana sy ny vava be, hoy ireo nampita ny vaovao tamin’ny mpanao gazety. « Manaova izay mahasahy anay ! », hoy ireo jiolahy, izay tena mirehareha tokoa raha ny fitantaran’ny mponina any an-toerana. Matahotra sy velon’ahiahy izahay satria tahaka ny fanjakana kely ao anaty fanjakana mihitsy ny an’ireto jiolahy ireto, hoy ireo mponina ao Sabotsin’Antongona ka miantso ny manampahefana mba hijery akaiky ity raharaha ity. Tena Mahagaga, hoy hatrany izy ireo fa hadihadiana ao amin’ny polisy, zandary eny hatreny amin’ny fitsarana ireto jiolahy ireto kanefa dia tafavoaka foana ary mamerin-keloka.

RTT