Fandriampahalemana

Posy sy sarety tsy manara-dalàna Miditra “fourrière” avy hatrany

Fandriampahalemana
Zoma 01 Jona 2018

Mitombo isa isan’andro tato ho ato ireo posy sy sarety mandeha amin’ny ora voarara eto an-drenivohitra.

Anisan’ny toerana tena ahitana azy ireny betsaka ny eny Anosibe, Anosizato, lalam-baovao boulevard de l’Europe izay marihina fa tena miteraka fitohanana goavana tokoa. Tsy mipetra-potsiny anefa ny kaominina Antananarivo Renivohitra manoloana izany. Raha ny fanadihadiana natao dia efa niasa nanomboka ny talata lasa teo ny sampandraharaha misahana izany manenjika ireny posy sy sarety tsy manara-dalàna ireny. Telo sahady no tratra teny amin’ny lalam-baovao tao anatin’ny indray andro izay voatery nampidirina fourrière eny Anosipatrana avokoa. Mbola hitohy hatrany ny hetsika hahafahana mandamina sy mandrindra ny fifamoivoizana eto amintsika. Raha tsiahivina, manomboka amin’ny 7 ora maraina ka hatramin’ny 7 ora hariva dia tsy afaka mandeha ireo posy sy sarety eto an-drenivohitra. Ho an’ireo polisy kaominaly manokana izay manampy amin’ny fandrindrana ny fifamoivoizana eto amintsika dia fantatra fa efa miroso amin’ny fanentanana sy ny fampianarana ireo mpitarika posy sy sarety eto an-drenivohitra izy ireo ankehitriny mialoha ny tena hampiharana ny lalàna.

Pati