Fandriampahalemana

Polisy ao Toamasina Hanao “Opération” mpanendaka sy mpangaro-paosy

Fandriampahalemana
Alatsinainy 25 Jona 2018

“Mila mifety ao anatin’ny filaminana ny vahoakan’i Toamasina, koa tsy mandefitra amin’izay mpitandro ny filaminana tsy mahavita mametraka izany amin’izao fiatrehan’ny vahoaka ny tsingerin-taona ny fahaleovantena Malagasy izao ny fanjakana”, hoy ny prefen’i

Toamasina Benandrasana Cyrille, araka ny lohahevitra noraisina tamin’ity taona ity niompana amin’ny fandrosoana sy ny filaminam-bahoaka ary ny fisandratana. Vokatr’izay dia samy nandray ny tandrify azy ny samy mpitandro ny filaminana. Ho an’ny polisy ao Toamasina dia nisy mihitsy ny “operation” mpanendaka sy mpangarom-paosy ary mpamaky trano amin’ny fampitomboana ny fiaraha-miasany amin’ireo andrimasom-pokonolona. Noho izany dia efa betsaka ny tratran’izy ireo ambodiomby sy efa miandry fitsarana am-ponja vonjimaika, nefa mbola betsaka koa ny ezaka atao noho ny firongatry ny fidorohana sy fivarotana rongony any an-toerana, izay saika renim-pianakaviana no tena mpibizina sy mpamongady izany. Raha ny fiatrehana ny fetin’ny tsingerin-taonan’ny fahaleovantena kosa dia efa nanomboka ny sabotsy ny hetsika samy hafa ara-kolontsaina sy ara-mozika, izay andraisan’ireo tarika avy ao Toamasina sy ny fahaiza-manao isam-paritra ho mariky ny firaisankinan’ny Malagasy. Miara-misalahy amin’ny fiarovana ny filaminam-bahoaka mandritra ny hetsika rehetra eny amoron-dranomasina kosa ny mpitandro ny filaminana sy ireo mpiambina tsy miankina.

Rakoutou