Fandriampahalemana

Partagé sur :
• facebook

Tsy mitsahatra ny asan-dahalo any amin’ny faritra Bongolava.

 Tsy milavo lefona ihany koa anefa ny zandary fa manao izay ho afany. Ny faran’ny herinandro teo, dia nisehoana fanafihan-dahalo tany amin’ny kaominina Ankerana Avaratra, distrikan’i Tsiroanomandidy. Tsy nanaiky lembenana anefa ny zandary fa nifampitana tamin’izy ireo, ka raikitra ny fifandonana, ary nandritra izany no nahalavo ny dahalo raindahiny iray. Nahatoky sy niantehitra mafy tamin’ny herin’ny moara sy ny odigasy nampiasainy io dahalo io, ary nieritretra ny tsy ho faty sy tsy handairan’ny bala, kanjo lavon’ny zandary. Anisan’ireo raindahiny ny tenany matoa sahy nifampitana tamin’ny mpitandro ny filaminana. Mampahery vaika ny dahalo ny fananany fitaovam-piadiana, ary matetika no andrenesana olona ambony mamatsy azy ireo, saingy toa efa tambanjotrana mafia mafia mihitsy ireo dahalo ambony latabatra, ka tsy mba voakitika fa ireo irakiraka hatrany no manefa. Nalaza, ohatra, ny fahatrarana vovoka akora simika “Chlorure de sodium” 210kg tany Betroka ny volana septambra, izay olona ambony avy any an-toerana no voalaza fa tompon’antoka. Nanamafy izany mihitsy ny tompon’andraikitra iray avy any an-toerana, fa olona akaiky ny fitondrana no tao ambadika. Raha ny fanampim-baovao nomeny hatrany, dia hahavitana 70 bala ny iray “madco” amin’io akora simika io, ary bala ana hetsiny maro no mety ho vita raha tsy sarona. Tsy vao izao anefa no nisian’ny asan-dahalo, ary inoana fa anisan’ny tena nampahery vaika izany ity aferana akora famokarana bala ity.

Toky R

Tia Tanindrazana

Samia mijoro ho an'i Gasikara.